Ñande Alet 31/01/2010 to leegal Liksaar ɗoo e Nuwaasoot,hakkunde waku 11h e 12h,noppi keewɗi cukkii e golal ɗojjugol ndee fiyannde boomaare.

gila hanki kikiiɗe,weeyo Nuwaasoot ene waylii no feewi e mbaydi mum ngoowaandi ndii,ɗo yiytere maa yani e Kammu ngu kala ko e duule pawotoo,haa ɗeɓaa sikkude ko e ndunngu wonaa,hakke ko kuurhuurngal ngal mawni,waɗii saha e kikiiɗe hanki o,ko baade guurɗe njoorii e Leydi…ko noon woori e kuurhuurngal ngal,gila ndeen haa e oo ɗoo saha mo ngon ɗen jooni!hakkillaaji fof ngonnoo ko e nguu ɗoo Kammu cuɗorii ngu duule,ne ukka ɓuuɓol,ne uura demminaare,tinaaka maataaka,haa fiyannde ɗojji,oolel mum huuɓtodini Nuwa,hakkillaaji kala owi,ɓerɗe njoŋii,keedti toon,to golalngal dilli too,ko ndeen jonaaɗo Yaakaare.cmo teppiti paɗe mum daroyii e ndeen nokkuure ɗo Gaasuuji ɗii petti ɗoo,kono ko kewi toon ko ene metti jantaade no feewi,ɗum ɗoo noon waɗi,ko to Liksaar sara Meeri ndi”deppoo Gaas”gonɗo sara Bursi Otooji e Butikaaji jeeyooji koltu e ñaamdenGalleeji Koɗaaɗi…ko ɗoon fiyannde ndee mawnde ndee waɗi,boomaare ndee ene yaaji,nde ɗum dilli ndee tan Pompiyeeji e Ammbilaauuji ndiirii ngari,ko ɓuri heen teskinde tan,ko nde Faabotooɓe ɓee njettii ndee,ɓe njanti tan ko e dariiɓe ene ŋaaɓi kunuɗe,sabu ŋakkeede gollorɗe,baawɗe heɓɓitaade e faabaade…ko maa ɓe ƴeewoyi won e Susiyateeji,ɓe ƴetti kaɓirɗe ko ɓe ngollorii.

sabu bonde e mawnde yirbannde ndee,Galleeji ɗiɗi njirbii heen,haa ngonti ɗooɗe cariiɗe!ko nde yahnoo haa woni hedde 14h25 ko boomii koo fuɗɗi waawde anndeede,tawaama Garde gooto ene jeyaa e maayɓe ɓee,e won ɗiɗo woɗɓe ngonnoo e Oto mumen ene mbirtii ɗoon,hawri e pettugol ngol,ɓeen ɗiɗo ko ɗoon kawri e lajal,won maayɗo gooto tawaa ko doole fuccitannde ndee ene weddii ɗum dow huɓeere,takkiinde e “Deppoo Gaas” cuɗo oo,ko noon kadi tawraa toon e nder ɗooɗe hee,yimɓe ɗiɗo,gollotonooɓe e nder Yeeyirde Gaas sumnde ndee,kam e Cukolel goɗngel ene yahra e duuɓi joyi(5)ko e Galle takkiiɗo e cumu ngu,ko ɗoon ngel jeyaa!.ene waɗi maayɓe woɗɓe ɓe njiyaaka tawo,e wonɓe e nder ɗooɗe ɓe cuwaa tawo yiyteede,ko laaɓi koo kam e ko njiyɗen,ko ene ɓura capanɗe tati Oto bonii heen,Yimɓe gaañiiɓe heen ɓee,ɗuum kam limotaako!ene wondi e galleeji ɗiɗi janɗi.

Yimɓe e yonaaɓe Laamu ngarii ɗoon e nokku hee,ko no ha Jaayndeyanke gooto heɓaani e maɓɓe konngol laaɓngol,ko yowitii e ndee fiyannde,kala e maɓɓe naamndaaɗo,jaabotoo tan ko :mi waawaa haalde e ɗum ɗoo hay dara,sabu ɗum gasaani tawo,ne gasa tawa won wonɓe e nder ɓale ene ɓilii toon,walla ene maayi,ne ubbii e nder leydi.

hono ndee ɗoo boomaare,tawa ko e cumuuji bonɗi bayɗi nii,meɗaa ni waɗde e nder Nuwa,ne gasa tawa ko hannde woni garwaniiwol!.

Ayaawo habrirde Moritani haalii kabaaru oo,kono jaɓaani haalde maayɓe ɓee no poti,ɓe kolliti tan ko yeebaare Yimɓe yeeyooɓe Gaas ɓee ene tabiti,hay heen gooto reentaaki,sabu Gasuuji ɗii ngoppatee tan ko e naange,kadi ɓe cimmo,ɓe ndefa Atayuuji sara majji,ɗii ngoppe e juuɗe Sukaaɓe…ko ndeen kadi Ayaawo ngoo,holliti Galleeji jirbuɗi ɗii e Otooji ɗii,ko no ɓe kolliraani Maayɓe ɓee!.

                                             A.Kelli@yaakaare.com